အလိုအလျောက်ကလေးတစ်ယောက်ပေါ်လစီ
နှုတ်ခမ်း စူထားသည့် အသက် လေးနှစ်အရွယ် သမီးငယ်ကို ညာဘက် ရင်ခွင်တွင် ချီပွေ့လျက် ကိုသိန်းဌေးတစ်ယောက် ခြေလှမ်း ကျဲကြီးများဖြင့် ခပ်မြန်မြန် လျှောက်လှမ်းနေသည်။ တစ်ဦးတည်းသော သမီးငယ်လေးကို ပြင်ပနေ့ကလေး ထိန်းကျောင်းကို ပို့မည်။ ပြီးမှ သူ့မိန်းမရောက်နှင့် နေသော အုတ်သဲကျောက်ဆိုင်လေးဆီသို့ အပြေးသွားမည်ဟု စိတ်ကူးလိုက်သည်။
ယနေ့ခေတ် မြို့ပြနေလူတန်းစားများတွင် အိမ်ထောင်ပြုပြီး မိသားစုများမှာ ရင်သွေးတစ်ယောက်ထက် ပိုယူရန် တဖြည်းဖြည်း ခက်ခဲလာနေသည်။
မြန်မာနိုင်ငံတွင် တရုတ်ပြည်ကဲ့သို့ "ရင်သွေးတစ်ဦးတည်းမူဝါဒ" မရှိသော်လည်း လူမှုစီးပွားရေး အခက်အခဲမျိုးစုံရှိသော မြို့ပြနေလူတန်းစား အများစုအတွက် အလိုလိုပြဋ္ဌာန်းပေးထားသကဲ့သို့ ဖြစ်နေပြီး ကလေးယူနှုန်းကျဆင်း နေခြင်းဖြစ်သည်။
ကိုသိန်းဌေးတို့မိသားစုမှာလည်း ထိုကဲ့သို့ အခက်အခဲဖြစ်နေသော မြို့နေလူတန်းစားများထဲမှ ဘ၀တစ်ခုပင်ဖြစ်သည်။
"ကလေးတစ်ယောက်တည်းနဲ့တောင် အလုပ်ကို လင်မယားနှစ်ယောက်လုံး ကြိုးစားနေရတာ။ နောက်တစ်ယောက်ထပ်ယူဖို့ တော်တော်စဉ်းစားရမယ်" ဟု ကိုသိန်းဌေးက သက်ပြင်းခပ်ဖွဖွချရင်း ညည်းတွားသည်။
လူပေါင်း ၃၅၀ ခန့်အား အင်တာနက်နှင့် လူတွေ့မေးမြန်းချက်များအရ မြို့ပြနေ လူတန်းစားများ၏ ၈၀ ရာခိုင်နှုန်းကျော်မှာ ကလေးတစ်ယောက်ထက် ပိုယူရန် ခက်ခဲလာနေကြောင်း ပြောဆိုကြသည်။
"တစ်လကို ရှစ်သောင်းပဲရတယ်။ မိန်းမကလည်း ကလေးထိန်းမယ့်လူမရှိလို့ အလုပ်ထွက်လိုက်ရတယ်" ဟု အသက် ၃၅ နှစ်အရွယ် ကလေးတစ်ယောက်ဖခင် ကုမ္ပဏီဝန်ထမ်းတစ်ဦးက သူကြုံ တွေ့နေရသည်များကို ပြောပြသည်။
လူတစ်ယောက်၏ နေ့စဉ်ဝင်ငွေမှာ ယနေ့မြို့ပြလူနေမှုစနစ်တွင် ကလေးနှစ်ယောက်ယူရန် ခက်ခဲသည်ဟု စစ်တမ်းဖြေဆိုနေသူများ၏ ၈၅ ရာခိုင်နှုန်းကဆိုသည်။
ကလေးတစ်ယောက်အတွက် မွေးဖွားစရိတ်မှာလည်း မြို့နေလူတန်းစားများအတွက် အခက်အခဲတစ်ရပ်ပင်။ ပုဂ္ဂလိက ဆေးရုံများတွင် ကျပ်သိန်းဆယ်ဂဏန်းမျှ ကုန်ကျနေပြီး အစိုးရကျန်းမာရေးဆေးရုံများတွင်ပင် ကျပ်တစ်သိန်းဝန်းကျင်ခန့် ကုန်ကျနေသည်။
"အိမ်ထောင်ကျပြီးတဲ့အချိန်မှာ ကလေးယူဖို့ တော်တော်ငွေစုခဲ့ရတယ်" ဟု အရောင်းဝန်ထမ်း အမျိုးသမီးတစ်ဦးကပြောသည်။
"အလုပ်လုပ်ပြီး ကလေးယူတဲ့အခါကျရင် နေ့ကလေးထိန်းကျောင်းတွေ ပြီးတော့ လူမှုရေးအထောက်အပံ့တွေ နိုင်ငံတော်က ပြည့်စုံစွာ ထောက်ပံ့ဖို့လိုအပ်တယ်။ အခြားနိုင်ငံတွေမှာဆိုရင် လူမှုစီးပွားရေး အထောက်အပံ့ ကောင်းကောင်းရှိကြတယ်" ဟု အမျိုးသမီးအခွင့်အရေးလှုပ်ရှားသူ မဇင်မာအောင်က တိုက်တွန်းပြောဆိုသည်။
အိမ်ထောင်ပြုသည့် အသက်အရွယ် နောက်ကျလာခြင်းမှာလည်း ကလေးတစ်ယောက်ထက် ပိုယူရန် အခက်အခဲတစ်ခုအဖြစ် ပါဝင်သည်။ မြို့ပြတွင် ပညာသင်ကြားနိုင်သည့် အခွင့်အရေးများပြားလာခြင်း၊ ပညာရေးကို ဦးစားပေးကြခြင်း၊ ငွေကြေးစုဆောင်းမှုအတွက် အချိန်ပိုမိုယူလာခြင်းတို့ကြောင့် အိမ်ထောင်ပြုချိန် နောက်ကျလာခြင်းဖြစ်သည်ဟု ပညာရှင်များက ထောက်ပြသည်။
"အိမ်ထောင်ကျတဲ့အချိန်မှာ အသက်က ၄၀ နားနီးနေပြီ။ နောက်တစ်ယောက် ထပ်ယူဖို့ မလွယ်တော့သလို အပြင်မှာ အလုပ်လုပ်နေတဲ့ မိခင်တစ်ယောက်အတွက် ကလေးတစ်ယောက်နဲ့တင် တော်တော်မလွယ်တော့ဘူး" ဟု အိမ်ထောင်သည်အမျိုးသမီး ဆရာဝန်တစ်ဦးကပြောသည်။
မိခင်ရော ဖခင်ပါ ရုန်းကန်အလုပ်လုပ်နေရသည့် သားသမီးများတွင် ကလေးတစ်ယောက်မှာ နွေးထွေးသော မေတ္တာနှင့် အကြင်နာအားပေးမှု၊ အသိအမှတ်ပြုမှုများ မရရှိလျှင် ထိုကလေးမှာ စိတ်ရောကိုယ်ပါ ကျန်းမာသောကလေးဖြစ်ရန် မလွယ်ကူတော့ဘဲ ကလေးအတွက် အနာဂတ်လည်း မကောင်းနိုင်တော့ဟု စာရေးဆရာမဂျူးက ပြောသည်။
"ကလေးတွေ အနာဂတ်မကောင်းခြင်းဟာ တိုင်းပြည်ရဲ့အနာဂတ်မကောင်းခြင်းပါပဲ" ဟု ဆရာမ ဂျူးက ဆက်လက်ပြောသည်။
၁၉၇၉ ခုနှစ်တွင် "တစ်အိမ်ထောင်တစ်ဦး မူဝါဒ" ကျင့်သုံးခဲ့သော တရုတ်ပြည်၌ လူငယ်များတွင် ကိုယ်ရည်ကိုယ်သွေးဆိုင်ရာ မူမမှန်မှုနှင့် လူမှုပြဿနာများ ကြုံတွေ့လာရသည်။ ယခုအခါ အဆိုပါ မူဝါဒကို ပယ်ဖျက်ရန် တရုတ်ပြည်သူအများစုက အစိုးရကို တစ်ညီတစ်ညွတ်တည်း တောင်းဆိုနေကြပြီဖြစ်သည်။
တစ်ဦးတည်းသော ကလေးများ အရွယ်ရောက်လာသောအခါ အသက်အရွယ်ကြီးရင့်ပြီဖြစ်သော မိဘနှစ်ပါးနှင့် နှစ်ဖက်ဘိုးဘွားများကို တာဝန်ယူရသည့် ၀န်ပိစေသောပြဿနာဖြစ်ပေါ်လာတတ်သည်။ ၎င်းကို ပညာရှင်များ
က ၄-၂-၁ ပြဿနာဟု ကောက်ချက်ပြုသည်။ ယင်းပြဿနာကြောင့် နိုင်ငံတစ်နိုင်ငံ၏ သက်ကြီးရွယ်အို စောင့်ရှောက်မှုအပိုင်း၌ အင်အားချည့်နဲ့နိုင်သည်ဟု သုံးသပ်ထားကြသည်။
ထို့အပြင် တစ်ဦးတည်းသော ကလေးများတွင် ပြင်ပပတ်ဝန်းကျင်နှင့် ဆက်ဆံသောအခါ အံဝင်ခွင်ကျမဖြစ်မှုနှင့် ပြဿနာများ ကြုံတွေ့ရသောအခါ ကိုယ်တိုင်ဖြေရှင်းရဲသည့် သတ္တိနည်းလာနိုင်သည်ဟု စိတ်ပညာဌာနမှ ကထိက တစ်ဦးကရှင်းပြသည်။
သားသမီးဆိုသည်မှာ မိမိနှင့် ထိုက်မှရသည်ဆိုသော ယုံကြည်မှု၊ ကလေးများနေသော်လည်း ကလေးအကြီးက အငယ်ကို ထိန်းသည်ဟု ထင်မှတ်ထားသော ဓလေ့နှင့် မျိုးဆက်ပွားကျန်းမာရေး ဗဟုသုတအားနည်းသူများတွင် ကလေးယူမှုများသည်ကို တွေ့ရသည်။
"သားသမီးဆိုတာ ကိုယ်နဲ့ မထိုက်ရင် ဘယ်လောက်ပဲလိုချင် လိုချင်မရဘူး" ဟု အသက် ၄၅ နှစ် အရွယ် ဟင်းသီးဟင်းရွက်ရောင်းသည့် ဒေါ်ညိုကပြောသည်။
မြို့ပြနေ လူတန်းစားအများစု၏ အိမ်ထောင်ကျလျှင် ကလေးနှစ်ယောက် အနည်းဆုံးယူချင်သော ရာခိုင်နှုန်းမှာ ၆၀ ရာခိုင်နှုန်းကျော်ရှိနေသော်လည်း လူမှုစီးပွားရေး အခက်အခဲများကြောင့် က လးတစ်ယောက်ထက် ပိုယူရန် စိုးရွံ့နေကြခြင်းဖြစ်သည်။
ကျန်းမာရေး၊ ပညာရေးနှင့် စားဝတ်နေရေးစသည့် အရည်အသွေးပြည့်ဝသော ဘ၀ကိုပေးရန် အတွက် ကလေးဦးရေများလျှင် မပေးနိုင်ဟု ယူဆကြပြီး သားသမီးအယူနည်းသော မိသားစုများ မြို့နေလူတန်းစားထဲ များပြားလာခြင်းလည်း ဖြစ်သည်။
"ဒီခေတ်ကြီးမှာ ရွေးချယ်ပိုင်ခွင့်က လူတိုင်းမှာရှိတယ်။ ဒါပေမယ့် မရွေးချယ်ခင်မှာတော့ ရှေ့ကို ကြိုပြီးကြည့်သင့်ပါတယ်။ ကိုယ့်ဘ၀ရဲ့ နောက်ပိုင်းအတွက်ပါ ရည်ရွယ်ပြီး စဉ်းစားသင့်ပါ တယ်" ဟု ရုပ်ရှင်သရုပ်ဆောင် ဒေါ်ဆွေဇင်ထိုက်က ပြောကြားသည်။
ငယ်စဉ်အခါက မိမိလိုချင်သမျှရ၍ ကျေနပ်ခဲ့ရသော်လည်း အရွယ် ရောက်လာသောအခါ တစ်ဦးတည်းဘ၀မှာ မကောင်း ကြောင်း တဖြည်းဖြည်း သိလာရသည်ဟု အသက် ၃၃ နှစ်အရွယ် တစ်ဦးတည်းသောသားအဖြစ် နေလာရသူ ကိုပြည့်ဖြိုးအောင်က ပြောသည်။ "အရေးအကြောင်း ကိစ္စဖြစ်ရင်လည်း အဆင်မပြေဘူး။ ကူညီမယ့်သူ နည်းတယ်။ ပြီးတော့ စိတ်ဖိစီးမှုလည်း ပိုများတယ်" ဟု ၎င်းကဆိုသည်။
မျိုးဆက်ပွားကျန်းမာရေး ဗဟုသုတနှင့် မိသားစုအစီအစဉ်များ (Family Planning) ရေးဆွဲခြင်းတို့ကို မြို့နေလူတန်းစားများက ကျေးလက်နေ လူတန်းစားများထက် ပို၍ကျင့်သုံးကြသည်ဟု နေပြည်တော်တွင် ကျင်းပသော ကမ္ဘာ့လူဦးရေနေ့ အခမ်းအနား၌ ဒုတိယသမ္မတ စိုင်းမောက်ခမ်းက ထည့်သွင်းပြောကြားခဲ့သည်။
အချို့မှာ ကလေးတစ်ယောက်သာ ရသေးသော်လည်း နောက်ထပ်တစ်ယောက် ထပ်ယူရန် အဆင်မပြေ၍ ကလေးမယူဘဲ သားဆက်ခြားရန် ဆေးထိုး၊ ဆေးသောက်နေသူ အများအပြားရှိကြောင်း ရန်ကုန်မြို့ရှိ ဆရာဝန်တစ်ဦးက ကြုံတွေ့နေရသည်များကို ရှင်းပြသည်။
"မြို့နေလူတန်းစားတွေမှာ ကလေးတစ်ယောက် ထိန်းဖို့ ဆရာမငှားရင် တစ်လတစ်သိန်းကျော်တယ်။ ကိုယ့်လစာတောင် အဲဒီလောက်မရဘူး။ အလုပ်ထွက်ဖို့ စဉ်းစားထားတယ်" ဟု ခြောက်ထပ်တိုက်၏ အခန်းကျဉ်းလေးထဲ ငှားရမ်းနေထိုင်ရသော မိခင်တစ်ဦးက ညည်းတွားပြောဆိုသည်။
အလုပ်လုပ်နေသော မိခင်များမှာ ကလေးယူပြီးသောအခါ အလုပ်ထွက်၍ ကလေးထိန်းကျောင်းရမည်လား၊ ကလေးအားနေ့ကလေး ထိန်းပို့၍ စီမံခန့်ခွဲရမည်လားဟု စဉ်းစားလာကြသည်။ စစ်တမ်းများအရ အိမ်ထောင်ကျပြီး ကလေးမွေးပြီးသောအခါ အလုပ်မှထွက်လိုက်ရသော မိခင်များမှာ ၇၀ ရာခိုင်နှုန်းအထိ ရှိနေသည်။
အစိုးရနေ့ကလေးထိန်းကျောင်းများ မလုံလောက်မှု၊ ပြင်ပနေ့ကလေးထိန်းကျောင်းများတွင်လည်း စရိတ်ကြီးမြင့်နေမှု၊ ကလေးတစ်ယောက် မွေးဖွားသောအခါ လူမှုဖူလုံရေးစရိတ် မရှိသလောက် နည်းပါးနေခြင်းတို့မှာ မြို့ပြလူနေမှုစနစ်တွင် ကလေးတစ်ယောက်ထက် ပိုယူရန် ကြောက်ရွံ့စေသော ပြဿနာထဲတွင်ပါဝင်နေသည်။
ကလေးငါးယောက် မွေးထားသော ဟင်းသီးဟင်းရွက်ရောင်းသည့် ဒေါ်ညိုအား မျိုးဆက်ပွားကျန်းမာရေး၊ မိသားစုအစီအစဉ်များဟူသော မေးခွန်းများမေးသောအခါ "ငါတို့က အဲဒါတွေ မသိပါဘူး" ဟု တစ်ခွန်းတည်းသာပြန်ပြောသည်။
တစ်ဦးတည်းသော မွေးဖွားထားသော ကိုသိန်းဌေးတို့ ဇနီးမောင်နှံက "အလုပ်လည်း သိပ်အဆင်မပြေသေးဘူး။ နောက်တစ်ယောက် ထပ်မယူချင်လို့ သုံးလခံ ဆေးထိုးထားတယ်" ဟု ဆိုသည်။
ရေးသားသူ- သတင်းအဖွဲ့
(ရေးသားသူ- ရဲနောင်၊ ဗိုလ်ဗိုလ်ဝင်း၊ ၀တ်ရည်အောင်၊ ခိုင်ခိုင်စိုး၊ဆွေမွန်)
7Day News Journal
0 comments:
Post a Comment